忌廉蘑菇汁[配牛扒]

係屋企煎扒，雖然話新鮮既扒只要加鹽同黑胡椒都已經夠好味，但有時候會覺得如果可以有配汁一齊食味道會豐富好多~

以前我地細個食鐵板扒餐，多數都係配黑椒汁或者洋蔥汁，但黎左外國生活之後，發現配扒類其實重有好多唔同既汁可以選擇。

番茄牛尾湯

家姐~~你知唔知我未嫁之前係幾咁恨飲牛尾湯~

因為媽咪唔食牛，所以屋企唔會有牛食…

但出街飲牛尾湯/ 羅宋湯成日都會覺得唔夠濃，唔夠味道

終於嫁左，自己可以係屋企煲!!!
落足料，煲一大煲分2日飲或者加意粉當一餐!!正呀~

*綠茶紅豆白玉芝士蛋糕*

 阿妹我好中意去食甜品，其中一個配搭...
就係綠茶雪糕加紅豆蓉再拌白玉...
今次就將我中意既甜品crossover我又好中意既芝士蛋糕...
估唔到成品好正~~大愛!!!!

[原汁原味] 鹽焗大蝦

自從學識左鹽板煎牛扒之後，發現鹽既傳熱同保溫能力咁好，
我就諗下有咩可以用鹽整，除左鹽焗雞，
其實鹽焗蝦都可以，而且蝦細隻又易熟，好快食得!! 

因為鹽焗無油份又無水份，又唔洗炒炒反反，
所以蝦既原汁原味都會完整咁保留，睇下呢張相，
蝦殼入面見到有好多蝦汁，食落真係特別鮮味!! 

材料：

蝦                10-14隻

粗鹽/海鹽   一包（約500g）

香茅           1/3枝(可省略)

黑椒粒         少許(可省略)

燒酒              少許

做法：

1. 香茅切碎，蝦先沖洗，挑腸用廚房紙索乾備用

2. 將鹽平鋪在平底鑊，約1cm厚，中火預熱5分鐘

3. 之後加入黑椒粒同香碎，輕輕炒均

4. 將蝦鋪上鹽上，加燒酒，蓋上鍋蓋焗4-8分鐘，
 （視乎蝦既大小）

5. 見到蝦熟轉色，就可以將蝦夾上碟擺盤。

姊姊心得：

*加熱左既鹽係非常非常熱，所以不建議原煲上，
 同埋原煲上桌，鹽既熱力會令蝦過熟

*一定要用木或竹既隔熱墊，如果唔係就會

*用完既鹽可以重複用2-3次

*想知鹽是否夠熱，灑幾點水，如水份即刻蒸發就表示夠熱

冬菇支竹炆排骨(蝦米辣椒醬版)

呢個餸第一次食係在朋友屋企…
另一半食到勁滋味，重好唔客氣地咁添飯!!!

朋友推介呢味餸既靈魂，就係"蝦米辣椒醬"!!!

好野當然齊齊happy share~

[清熱去濕之選] 薏米綠豆沙

最近天氣超級潮濕，濕度高100%，家中抽濕機差唔多長開…
個人濕濕重重…好累咁，連老友”濕疹”都搵上門…
所以即刻煲返個清熱去濕糖水飲下~~

綠豆味甘、性寒，無毒，入心胃兩經，具有清熱消暑，
利尿消腫，潤喉止渴及明目降壓的功效;
薏米可以去水腫，美白，仲利水、健脾、清熱排毒的功效，
更可以改善胃腸消化、便秘。

材料:
綠豆        4兩(約150g)
生薏米     2兩(約80g)

海帶         適量

冰糖         適量

果皮         1塊

水           約6碗

做法:
1. 綠豆、薏米洗淨，先浸1小時

2. 果皮浸軟，刮囊; 海帶浸發切條

3. 綠豆、薏米及果皮，隨水煲滾

4. 滾透後，加入海帶，細火煲45分鐘

5. 加入冰糖，再煮15分鐘

6. 熄火不要開蓋焗最少1小時

7. 食得啦!!

妹妹心得:
*用真空煲都可以，係Step 4加海帶及糖後，煲滾5分鐘，
 即可放入真空煲內燜焗3小時

*中途如發現唔夠水，可適量加入熟水

*雪凍會更加好味

芝士煙肉焗薯批

上星期有一晚，你姐夫好夜先收工，準備煮個宵夜俾佢，但煮麵炒飯好似無咩新意，見屋企有幾隻薯仔，就整左呢個焗薯批，雖然宵夜比較肥膩，但真係好食到停唔到口。

台式香菇肉燥

岩岩去完台灣返黎，仲好掛住D台灣小食…

又買左支台灣醬油膏，當然要煮煮佢啦~~

真係勁好味，另一半食左2大碗飯呀~~

而且今次用真空煲煮，慳時又慳火!!

班蘭戚風蛋糕(自製班蘭汁版)

因為勁中意食新加坡好出名既班蘭蛋糕，
所以決定要自己試下整~

買到新鮮班蘭，自製埋班蘭汁，咁先夠晒天然嘛!!

出爐個綠色勁吸引，完全冇落色素香油~正

食落好鬆軟…I am loving it!

喜馬拉雅山岩鹽板煎牛扒

之前托阿妹你係日本買既喜馬拉雅山岩鹽板，
終於有時間同佢開光！

其實鹽係一種傳熱用保溫好好既物質，
就好似大家平時煮既鹽焗雞一樣，佢地用大量既粗鹽焗雞，
令雞受熱平衡又帶一種鹹香味。

喜馬拉雅山岩鹽板大致上既用法都一樣，
係煎食材既時候，令佢蘸上天然食鹽既鹹味，
再帶起食物本身既原味鮮味。

呢塊鹽板真係好重，24x24x3 cm有成3kg重，
所以應該有排用！

上網參考左鹽板既煮食方法，
再加上我親身體驗，今日就同你分享下喇。

今次我重整左條30秒既短片，簡化左整個過程俾你睇: 鹽板煎牛扒   <<---

用之前用微濕既布輕輕擦一下表面，
然後就可以直接放上火預熱。

首先用小火預熱10分鐘，再轉中火預熱10分鐘。

預熱期間鹽板既顏色會變白，是正常的，
因物鹽係天然物質，受熱係會有顏色變化。

要知道鹽板是否夠熱力，可以灑些少水上去，
如果水點即刻完全蒸發，就代表夠熱可以開始煎。

煎法跟平時鐵板燒差不多，噴一層油，保持中大火就可以煎食物。要有油份，否則會痴。

可以煎肉類、菇類、海鮮都可以。

但食材要選擇水份少和一定要保持乾身，否則水份趕不及蒸發，過多既水份就會溶化鹽板，令食材味道變得過鹹。

而且有個好處就係用這個鹽板煎食物是不會有油煙。

用過既鹽板一定要待它完全冷卻材可用乾身既鋼絲刷同微濕既布輕輕清潔，抹去表面既油就可以，過份清潔或用過濕的布去清潔，會溶化鹽份，縮短鹽板既壽命。

清潔之後可以做保鮮袋包好，收藏係乾爽既地方。

鹽板煎牛扒配紅酒!!

'雞泡膠燉湯'

前幾日上網，發現有好多人講雞泡膠對女仔身體好，可以調經、養生重話可以係水上人既秘方，會好易中架喎！講到咁勁，搞到我都想試下，話晒我都努力緊，想等妳個姨生仔有個伴嘛～～尋日放工開車果陣，重問緊老公澳洲邊度有得買呢D雞泡膠，就突然醒起，妳上次黎果陣好似買左包唔知咩花膠俾我，大大包細細隻。。。

因為妳地次次黎都買一大埋海味過黎，咩都有D，我收到就多數直接放上櫃，其實都唔太知有咩。就因為咁，我成程車就係咁估果包係咩膠，搞到我突然好緊張⋯

一返到屋企，即刻飛搏去廚櫃，最後係櫃頂搵到，原來真係一大包雞泡膠！ yeah!!! 妳真係好update兼勁8卦過我，無論興咩食咩妳都知～

網上搵到D煮法，我就唔想整糖水，總覺得花膠都係唔襯甜味。我就學左整燉湯，加埋自己湯盅+蒸爐既煮法，教左妳就當多謝妳既「先見之明」喇！

材料：

已浸發雞泡膠  2隻

白蓮   40g

百合   40g

圓肉（龍眼乾）30g

瘦肉   150-200g

滾水   800ml

做法：

1. 蓮子、百合同圓肉沖洗之後浸水15分鐘

2. 將瘦肉切幼條，同時要煲定水

3. 將所有材料平均放落2個湯盅，加滾水到8-9分滿，放入蒸爐，100c 純蒸2.5小時

4. 飲之前加少少鹽，就飲得

姊姊心得：

1. 蓮子洗果陣睇下係咪清晒條蓮子芯，我無睇清楚，頭先食左粒有芯既，好苦。

2. 一次可以燉2盅，個蒸爐重有位就用盡佢，同樣方法落花簱參加瘦肉又分2盅，燉埋俾老公飲，飲唔晒，第2盅留返第二日飲！

3. 麻煩妳教我點做蒸爐發花膠，我唔識同時唔想做我D靚花膠做白老鼠～～

'韓式醬汁炆牛肋骨'

今次呢個係偷懶食譜，而且就只有洋蔥同牛肋骨，但出黎既效果非常好。最啱就係家庭或朋友聚會要煮大鑊飯（多人餐），需要準備好多餸既時候，呢個可以預先準備好，開飯前反熱就食得！

材料：

牛肋骨  600g

韓國牛骨醬汁 200ml

水 150ml

洋蔥一個

做法：

1. 洋蔥切絲備用

2. 牛肋骨沖洗，切去多餘既肥羔

3. 將牛肋骨、洋蔥、水同醬汁撈均醃2小時以上

4. 開中大火，先煎香牛肋骨2面

其實只要鑊夠熱，煎有醬汁既肉都唔會黏鑊~~

5. 轉細火，再將醃肉汁倒入，炆45分鐘- 1小時

6. 成功！

TACO 墨西哥脆餅

墨西哥既食品近幾年越來越受歡迎，除左Nacho 之後，Taco 都好出名。我係澳洲都經常會整黎食，因為材料簡單，好快食得，偷懶唔煮飯，食佢都唔錯！

照燒魷魚

係屋企其實好少食魷魚，因為高膽固醇，
盡量少食，留返出街先食…

不過早排買左支照燒汁，行街市見到有魷魚!!
就決定整返個surprise俾另一半啦!

因為佢其實好中意食架~~~~

材料:

魷魚        2隻

照燒汁    2湯匙

醃料:

照燒汁    2湯匙

味醂       2-3湯匙

老抽       2湯匙

胡椒粉    少許

做法:

1.     街市買原隻魷魚，多數都會幫忙劏好，     回家去衣拆骨沖洗乾淨，      魷魚得1條骨，細力一撕就除去

2.     魷魚筒中間切幾刀(如圖)，但不要切斷

3.     用醃料醃15-20分鐘

4.     焗爐180C預熱，焗10-15分鐘(視乎大細)

5.     出爐後掃多層照燒汁

6.     食得!

妹妹心得

*唔醃魷魚，直接掃汁焗都可以，但醃一醃會入味D

*照燒汁=鰻魚汁，唔焗魷魚，平時焗肉類都可以^^